ஸ்ரீ அகிலாண்டேஸ்வரி நவரத்ன மாலை

ஸ்ரீ அகிலாண்டேஸ்வரி நவரத்ன மாலை

காப்பு

ஏற்றம் எளிதாய் என்றும் அமைந்திட
தோற்றம் நலமாய் மலர்ந்திட அருளும்
ஊற்றின் கண்ணே நவ மாலையினை
உயர்வாய் காக்கும் கண நாயகனே

மாதா ஜெய ஓம் அகிலாண்டேஸ்வரி
மாதா ஜெய ஓம் பரமேஸ்வரியே
மாதா ஜெய ஓம் அகிலாண்டேஸ்வரி
மாதா ஜெய ஓம் பரமேஸ்வரியே

வைரம்

கற்றோர் தெளிவே கனிவாழ் அமுதே
கலைகள் இடைவாழ் கரையா நிலவே
பற்றும் அடியார் நினைவே என்றும்
பசுந்தேன் மழையே இமவான் உமையே
பனிப்பூங் கணையும் பாசாங் குசமும்
இனித்தே கரத்தில் அணையும் கொடியே
வைரத் திருமேனியளே வருவாய்
மாதா ஜெய ஓம் பரமேஸ்வரியே

மாணிக்கம்

கானத்தினிலே உயிரானவளே
கருதக் கிடையா மறையானவளே
வானத்தினைப் போல் வடிவானவளே
வரையக் கிடையா அருமைப் பொருளே
நாடித் திருநாமமும் நின் துதியும்
நவின்றால் அவரை நீங்காதவளே
மாணிக்க ஒளிச் சுடரே வருவாய்
மாதா ஜெய ஓம் பரமேஸ்வரியே

கோமேதகம்

வீரத் தனலே சரணம் சரணம்
விதையாய் மரமாய் விளைபவள் சரணம்
வேதப் பொருளே சரணம் சரணம்
வினவா மொழியின் விடையே சரணம்
கோமேதகமே குயில் மாமயிலே
குழல்வாய் மழலை மொழியே வருவாய்
வானோர் மகளே வரும் மாமழையே
மாதா ஜெய ஓம் பரமேஸ்வரியே

பவளம்

நந்தினி சௌந்தர்ய கானவி சங்கரி
வைஷ்ணவி சாமுண் டீஸ்வரி காளீ
பஞ்சமி பைரவி கௌமாரி யளே
பரிபூரணி நாராயணி வாணீ
அஞ்சுக தேவி மகேஸ்வரி கௌரீ
அகிலாண்டேஸ்வரி பவள சொரூபினி
மங்கல நாயகி சந்த்ர கலாதரி
மாதா ஜெய ஓம் பரமேஸ்வரியே

மரகதம்

உறைநின் கோலம் மனதில் என்றும்
நிலைக்கும் நலனை எமக்கிங் கருளி
பதிக்கும் செயல்கள் எதிலும் உனையே
துதிக்கும் அடியேன் திறனைப் பேணி
வாக்கும் மனமும் வளம்பெற நாளும்
தாக்கும் மாயை தகர்ந்திடச் செய்து
காக்கும் மாதவ மரகத வல்லீ
மாதா ஜெய ஓம் பரமேஸ்வரியே

வைடூர்யம்

ஒன்றாய் அரும்பி உலகிங் கெல்லாம்
வென்றாய் ஆற்றல் வைடூரியமே
குன்றா மணியே ஒளிரும் குவையே
நன்றே தாய்மை நலமே வருவாய்
உத்தமி நீயே! உமையவள் நீயே!
உலகினை ஆளும் கொற்றவை தாயே!
முப்புரம் எரித்தவன் முழுமுதல் பத்தினி
மாதா ஜெய ஓம் பரமேஸ்வரியே

நீலம்

வெள்ளி விடிந்த பொன்னிற வானம்
வேத பாராயணம் செய்திடும் வேளை
சிந்தை நிரம்பிய அம்பிகை கோலம்
சேர்ந்து நலம்தரும் மங்கலம் யாவும்
நீலத் திருமே னியளே உமையே
நினைவார் நெறியில் நிறையும் பொருளே
வாலைக் குமரி வருவாய் அருள்வாய்
மாதா ஜெய ஓம் பரமேஸ்வரியே

முத்து

வித்தே விதையுள் உறையும் கருவே
விலகா பதியின் பிரியா விடையே
முத்தே உலகின் முதல்வி சரணம்
முடியா தியங்கும் விசையே சரணம்
மத்தேறிய பால் தயிராய் திரியும்
அஃதே அழியா ஆற்றல் உனதே
சித்தே சிவசக்தி யளே வருவாய்
மாதா ஜெய ஓம் பரமேஸ்வரியே

பத்மராகம்

மங்கலம் மேவிய நின்திருக் கோலம்
மகிமை நிறைந்த குங்குமத் தாதும்
என்றும் நிலைத்திடும் புண்ணிய வதனம்
ஏடுகள் தோறும் உன்புகழ் வாசம்
எந்த மனத்தும் எதிலும் இருப்பாள்
சந்திர பதும ராக வியாபினி
மந்திர தந்திர யந்திரம் யாவிலும்
மாதா ஜெய ஓம் பரமேஸ்வரியே

பலச்ருதி

எவர் எப்பொழுதும் இயல்பாய் அகிலா
நவ ரத்தின மாலையினை நவின்றிடுவார்
அவர் நற்பலன்கள் விரைவாய் அடைவார்
சிவசக்தி அருட் குணமும் பெறுவார்.