பிறனில் விழையாமை - அறத்தையும், பொருளையும் கற்று அறிந்தவரிடம் (தினம் ஒரு திருக்குறள்)

குறள் : 
பிறன்பொருளான் பெட்டொழுகும் பேதைமை ஞாலத் 
தறம்பொருள் கண்டார்க ணில் 
மு.வ விளக்க உரை: 
பிறனுடைய உரிமையாகிய மனைவியை விரும்பி நடக்கும் அறியாமை, உலகத்தில் அறமும் பொருளும் ஆராய்ந்து கண்டவரிடம் இல்லை. 
சாலமன் பாப்பையா விளக்க உரை: 
இவ்வுலகில் அறத்தையும், பொருளையும் கற்று அறிந்தவரிடம் அடுத்தவனின் உரிமை ஆகிய மனைவி மீது ஆசைப்பட்டு வாழும் அறியாமை இல்லை.
கலைஞர் விளக்க உரை:
பிறன் மனைவியிடத்து விருப்பம் கொள்ளும் அறியாமை, உலகில் அறநூல்களையும் பொருள் நூல்களையும் ஆராய்ந்து உணர்ந்தவர்களிடம் இல்லை