புதுவை கிருஷ்ணர் கோவிலில் கிருஷ்ணஜெயந்தி விழா!

புதுச்சேரி பாரதிவீதியில் பிரசித்திபெற்ற சுந்தரவதன கிருஷ்ணர் கோவில் உள்ளது. இக்கோவிலில் ஒவ்வொரு ஆண்டும் கிருஷ்ண ஜெயந்திவிழா வெகுசிறப்பாக நடைபெறும். அதுபோல் இந்த ஆண்டு கிருஷ்ணஜெயந்தி விழா வருகிற 30-ந்தேதி தொடங்கி அடுத்த மாதம் (செப்டம்பர்) 3-ந்தேதி வரை நடக்கிறது.

30-ந்தேதி முதல் 1-ந்தேதி வரை மாலை 6 மணிக்கு சுந்தரவிநாயகர், பெரியபாளையத்தமன் மற்றும் சுந்தர சுப்பிரமணியருக்கு மகாஅபிஷேகம் நடக்கிறது. 2-ந்தேதி காலை 9 மணிக்கு சுந்தரவதன கிருஷ்ணருக்கு மகாசுதர்சனஹோமம் மற்றும் தீபாராதனை நடைபெறுகிறது. மாலை 6 மணிக்கு திருமஞ்சனமும், இரவு 9 மணிக்கு சுந்தரவதன கிருஷ்ணர் வெண்ணைதாழி அலங்காரத்தில் அருள் பாலித்தல் நிகழ்ச்சியும் நடைபெறுகிறது.

3-ந்தேதி காலை 10 மணிக்கு சுந்தரவதன கிருஷ்ணருக்கு சிறப்பு அபிஷேகம் மற்றும் தீபாராதனையும், மதியம் 12 மணிக்கு சமபந்தி போஜனம் நடைபெறுகிறது. மாலை 6 மணிக்கு சந்தனக்காப்பு அலங்காரமும், மாலை 7 மணிக்கு உறியடி உற்சவமும் மற்றும் சாமிவீதிஉலா நடைபெறுகிறது.